Berdinketa Urbietako derbian
Urdinek berdindu egin dute Gernikaren aurka gaur arratsaldean Urbietan jokatu duten prestaketa partidan. Jon Castrilloren mutilek, ligari begira bateriak kargatzen jarraitzen dutenek, aukera ugari sortu dituzte, baina horietako bakarra sartu da Muguruzaren bitartez atsedenaldia baino lehen eta etxekoek 1-1ekoa ezarri dute bigarren zatian Herri Torronteguiren golarekin.
Gureak hobeto atera dira eta aukerak sortu dituzte, hala nola egurrean jo duen Hernaizen saiakera bat edo Erik Moranek area ertzetik egindako jaurtiketa bat. Etxaniz Muguruzaren erdiraketa ona ehizatzear egon da gol-ahoan eta atezainak erantzun ona eman dio Hernaizen zartako bati. 0-1ekoa heldu baino lehen azken abisua Iker Torrek egin du, langa gainetik egindako erremate indartsu batekin. Golaren saria atsedenaldia baino hamar minutu lehenago iritsi da Muguruzaren bidez. Gureek estutzen jarraitu dute zutoinetik gertu atera den Rekaren jaurtiketa batekin. Larralde abantaila handitzeko zorian izan da aldageletara joan aurretik Muguruzaren erdiraketa bikain baten ostean, baina bere erremate gurutzatua kanpora joan da.
Bigarren zatia parekatuagoa izan da, aukerekin bi ateetan. Hernaizek 0-2koa gertu izan du, baina jaurtiketa gurutzatuegia joan da. Gero, Murgoitiok eskularrua sartu behar izan du berdinketa saihesteko, 69.ean iritsi dena Herriren bitartez. 1-1ekoaren ostean Gernikak gora egin du eta Murgoitiok hanka sartu behar izan du bigarren gola saihesteko. Amaierarako hamar minuturen faltan, urdinek aukera paregabea izan dute Bikandiren bitartez. Aurrelari gaztearen jaurtiketak zutoinaren kontra jo du. 85. minutuan ere gola sartzeko zorian egon da Josep Diaz Ederren erdiraketaren ostean, baina ez du saria aurkitu.
GERNIKA CLUB: Iraitz Gelbentzu, Carles Soler, Enaitz Isasi, Urko Martija, Joseba Pérez, Aser Bikandi, Alex Olea, Luken Aranguena, Anartz Rementeria, Herri Torrontegui eta Iñigo Baqué. Aulkitik Manex Aristi eta Iñigo López zelairatu dira.
SD AMOREBIETA: Murgoitio, Muguruza, Presa, Diaz de Alda, Iker Torre, Hernaiz, Erik Morán, Agirre, Larralde, Reka eta Etxaniz. Aulkitik Eder, Josep Díaz, Cabo, Intxausti, Ajuriagoikoa eta Bikandi atera dira.
Golak: 0-1: Min. 35; Muguruza. 1-1: Min. 69; Herri Torrontegui.
Árbitro: Jon Andrade.
